Horní Suchá

Zápis z wycieczki do Pragi

11.-12.10.2008

Uż to wypadało, że jako organizátor turystyczny nie zorganizujym żodnóm wycieczke, ale propozycja na mjuzikal v Pradze zabroł u tych pani co u nich miyszkómy a tak żech se chytnył organizacji. No moc żech tymu nie doł a niechołech to na moi połowiczce. Listki na Kleopatre my kupili 1 miesiónc rychli, tak tam nie był problem. Ubytowani ale Karin zmakła famoznie, bo mi mało gdo uwierzy, że my spali v hotelu v Pradze o 4 gwiozdach za 335KCZ na łebek a ku tymu ai luksusni śniodani.
Rano v sobote była eszcze ćma a i mgła jak my se posłesznie zeszli na banhofie w Ober Suchau. Komplet familia Mikułów a Zyłów, Rokowscy bez dziecek. Paweł to iścił SMS-kóm, że nas czako w Ostrawie. Przibrała go Lucyna z Wyndrynie. (uwaga autora-nazwisko żodyn nie zno, ale Krużelowa nima na betón). Hned na banhofie Tomek wycióngnył flaszke wódki, aby se nóm lepszy jechało.
We Swinowie uż my byli komplet. Kupili my jakisi czytani do cugu a uż my nasiodali do Pendolina. Chciało by se napisać, że droga przebiegła spokojnie a też tak było. Eszcze pore razy my wyzkuszali kwality wódki od Tomka a skoro my byli w Pradze. Jedynie co stoi za zapis je fakt, że uż we Studence zaczynały padać u naszych połowiczek taki słowa jak szoking. Ale nic szokujóncego ni miały na myśli, szło o prosty szoping. Ale to żech ni mioł w programie. Bo se miało iść do muzea woskowych figurin a na obiod. Jak my wylyźli z Banhofa zacznył se mój plan rozpływać jak para nad gorkym. Jo szeł z mojóm familijóom kupować zaruczenie super bóty na tańcowani, Roki a Paweł był w Paladiu na kawce. Za to Zyłki mi zrobiły radość, bo fakt szli do tego muzea figuryn. Pry za 5 min. utracić 3 stówy se enym tak nie poszczynści, ale co móm prawić jo jak mnie 2min. nieostrożności stoło skoro 8x tela. Pry fakt super bótki na dancing. No uwidzymy, bo szlusskolóona bydzie co by dup.
We własnym czasie my se zeszli U medvidków na obiod. Fakt organizacja klapowała super, bo stół byl nagotowany a świyczkowa fakt stoła cosi nad stówe. Tomkowi a Rokimu jaksi nie siedzioł Budwar co niedzwiadek toczył, tak hledali jakisi wiyncyj gradowe w miejscowym browarku. Jak uż żech kiejsi prawił, tyn becher se radszy dóm ekstra, nimusim go mieć zamieszany do przodku.
Dobrze posilnióni my wyszli na metro po bagaże a że pry na hotel, piyrsze se to zdało kupa czasu, ale jak my se tak dziwali na ty cebule z rafigami, adrenalin to byl aż do 18:00 godz. Metro, autobus, buking w hotelu, przewlyc, prysznic, wywóniać, autobus, metro C, metro B, sprint do Bredweja, wysikać a uż se scyna otwiyro a na ni główna megastar Kamila Nyvltova.
O poziomie Kleopatry se doteraz kludzóm dyskusje, kdo właśnie była ta królewna, Lucy czy Kamcza, a kiero właśnie lepszy śpiywo. Ale nakóniec z Pawła wypadło, że mu od Kamczy aż zamroziło kolem kryngosłupa, tak nie wiym.
A je tu wieczorowo Praga, też my se kapke cieszyli, na spodku Waclawaku, u po rusku gadajóncej obsługi, my musieli se dwa razy upómnieć o swarzak, ale nakóniec to klapło. Spoko krokym my doszli aż ku teatru narodowymu, fakt monumentalne dzieło, tak blizko żech fakt eszcze nie był. Za teatrym my w miejscowej knajpie U nováků cykli po piwku, a tymu że była kapke kosa a nikierzi upadali do komatu tak my se przesunyli na Top Hotel. Grupa z dzieckami szła piyrszo, uderzeniowa grupa bez dziecek jechała o jedno metro nieskorzy. Linke 115 do hotelu Karin z Tomkym drżeli wlasnym ciałym aby poczkała na Pawła and company, ale nie podarziło se. Dognali nas taksalym….
Te sobote ci wytrwali zakóńczyli w pokuji u Rokich, kaj Andrzej kónecznie wycióngnył po achtliku broskwowej. A teraz jak nic tu nic z balkóna se ozywo „teď královnou jsem já“. To Lucy se staro dognać gwiazdy szowbiznesu. No nic, jak tychachtlików było wiyncyj, szli my spać. Fakt tego było dość.
Taki frmol przi śniodaniu żech nie widzioł ani ana dowolenej z czeskóm cestowkóm. Dokóńca moja ani nie trefiła ku mnie ku stołu a śniodała z uderzeniowóom grupóm.
Popakowali my se, zapłacili fantazy price tj. 330KCZ na łebek ai z tym breakfestym. Odjechali na hlawacz. Tam padła piyrszo kańka fajnego weekendu. To tu organizatorka kapke nie zwładła. Jechali my do dómu Eurocity cugym, coż bylo cosi miyndzy dobytczokym a normal sztudakym. Organizatorka zustała w Praglu służbowo a jechało se ku chałupie. Za Olomoucym uż my siedzieli grupowo w jydnym kupé a maścili karty, dopijali broskew, wódke a mojóm whiski. Szkoda, że Paweł nie wzión nic ze sebóm, asi myśloł, że jak nie pije ón tak żodyn, no szkoda, możnyk se next time polepszy.
Finałowy CityElefant do Suchej był kwalitatywny szok. Ale to uż Pawel zaś nas z Lucynkóm ignorowali a jechali se solo. Zycz a bydzie Ci życzóne mówi jakisi przisłowi.....
Ostatnio fotka na banhofie a wszyscy ku chałupie. Było fajnie a priszły rok zaś kansi indzi.....
Cieszy se organizator.